نظرية البونبوناية..

انتى بونبوناية او مصاصة..يعنى حسب مزاج الشيخ اللى بيتكلم..المهم انك حالة حلوة بتتتاكل فلازم تتلف كويس عشان تتقدم صح للى هياكلها..اه والله بجد دة كلام حقيقي اتقال عليا وعليكي ..على البنات عموما...
بيقولو ان المصاصة "المتعرية"..عشان هى حلوة وبطعم اللمون بيعف عليها الدبان الكتييير..بس المصاصة "اللى مش متعرية"..عشان هى احلى بقا وبطعم الفراولة محدش بيقدر يلمسها لانها ملفوفة....
ايهما تشبهين.؟؟ المصاصة اللى بالفراولة ولا المصاصة اللى باللمون...!! ممممم
اد كدا انا قدرى رخيص ..ولم ارقي حتى لو كونى نص انسانة فأنا مجرد مصاصة او جوهرة او بونبوناية وانت كمان مجرد "دبانة"....
وبعد اكتشاف هذا الاكتشاف العلمى الرهيب ان البنت مصاصة ..اكتشفنا انها لازم تتلف..يعنى لازم تتلفي في غلاف صلب جامد عشان ميوصلكيش اتربة او دبان او ناموس او اى حاجة من اللى بتطير في الهوا دى..وعشان كمان تتاكلى بشهيه وميجيش للى بيكلك تسمم غذائي...!!!!
وعشان نطبقو الاكتشاف على ارض الواقع هنعملولك عربيات خاصة بيكي واتوبيسات خاصة بيكي ..وتبعدى عن الدبان قصدي الرجالة..وهما كمان يبعدو عنك لحد ما يختارو طعم ياكلوه ...
................................
انا مش بونبوناية او مصاصة او جوهرة .انا انسان بحس وبتألم وبفرح وبزعل..وليا اختيارات لان ربنا خلق جوايا قلب وعقل زي زيك وهيحاسبنى على فكرة على اختياراتى .مخلقش جوايا لبانه بتعمل بلونة كبيرة..!!!!
وبسبب حلكم االعبقري واكتشافكم الرهيب اكتشاف ان في الاخر البنت طلعت "مصاصة "..بس متنكر في شكل انسان حصلت الحاجات دى............
*البنت لما بتتكلم في الشارع وتطلب حقها بتلاقي الف صوت يقلولها اسكتى انتى بنت مينفعش تتكلمى..
*النت خافت تقول لاهلها انها حصلها تحرش لانهم هيعملوها بمنطق البنبونى اقعدى بقا في البيت..

*البنت بقت بتستقبل التحرش على انه شيء عادى ويومي في حياتها بما انها اختارت تكون المصاصة رقم 2..اللى بيعف عليها الدبان ...
*البنت بقت تشوف لبس يعجبها ..تكتشف نظرية المصاصة فتتراجع عن الفكرة من الاساس..
*الشباب بقو يمشو في الشارع يقولولها ياحلو يا سكر..منكم لله..
.....................................واخيرا..
ان كل واحد بيشوفنى مصاصة بطرقته..يعنى واحد بيشوف بنت بشعرها مصاصة عريانة..وواحد بيشوف بنت محجبة حجاب عادى..مصاصة عريانة..وواحد بيشوف واحدة منتقبة برضووو مصاصة عريانه..لان كل واحد وزوقة في المصاصات...!!
يريت تقعدو مع بعض وتحطو شروط للمصاصات العريانة ونوع الغلاف اللى هيحميني من "الدبان".............!!!
..............................
انا خلصت اقفل بسرعة بقا احسن اسيح ...:D 

متسكتيش..

اليوم : الخميس 17/1/2013 
المكان : تحت بيتى 
الحدث ,,

كنت جايه من برا و فى شارع بيتنا و تحت العماره لما " تم التحرش بيا " 
واحد جه عدا من جنبى و أتحرش بيا و قرر يمشى و لا كأنه عمل حاجه ,, و أنا قررت أنى أخد حقى . 
بدأت أزعق و أقول " أنت فاكرنى هسكتلك و هسيبك , تعالى هنا , أنا بكلمك , و هو يمد بسرعه لحد ما دخل " الجامع " - الجامع بعد مدخل العماره بالظبط - 

أه والله دخل الجامع يصلى بعد ما أتحرش بيا ! 
بدأت الناس تيجى على الصوت - اللى هما أهل شارعنا اللى كلهم عارفنى - و قلتلهم على اللى حصل , بدأوا يقولولى كلام من نوعية " طيب أطلعى بيتك و أحنا هنجيبه , متشوشريش على نفسك , امشى " 

شتمتهم و قلتلهم أنا واقفه قدام باب الجامع لغايت ما يطلع , يورينى هيمشى إزاى والله ما هسيب حقى - و هو مستخبى جوا الجامع -

الناس عملت كل الطرق الممكنه عشان أطلع بيتى و أمشى , و أنا مكنش عندى غير كلمه واحده , هاتهولى من جوا الجامع !
جابوه , أول ما طلع لسه بقرب و هضربه مسكونى و منعونى , و هو قال بالنص " والله ما عملتلها حاجه بمنتهى البراءه " فضلت أقوله أنت كداب و هما يمنعونى عنه لحد ما خدوه من قدامى و دخلوه الجامع تانى !
- كل ده و أنا لوحدى - 
ثم , ماما نزلتلى , الناس كترت أكتر , أبوه جه و جابه من جوا الجامع و جاى عليا أنا و ماما و بعد ما عرف فيه ايه كان ده رده و رد كل اللى واقفين 
" ابنى أنا ؟ أنا ابنى من البيت للجامع و من الجامع للبيت إستحاله يعمل كده , و لو عمل كده أكيد غصب عنه " ماما بدأت تزعق و أستمرينا كده شويه 
و بعد ما أبوه حس أن ابنه غلطان و فيه رجاله جايه و انى مش هسيب حقى طلع أبنه البيت يستخبى 
لحد ما بابا وصل و خلانى و رجالة العيله كلهم و رفضوا الكلام مع اى حد غير لما الواد يجي - فى هذه الأثناء و مع وصل الرجاله , لهجة كل الناس اللى كانت واقف أتغيرت تماماً من الهجوم و السخريه لـ أحنا آسفين , و حقك علينا و ايه اللى يرضيكى - 

لحد ما الولد جه و خالى ملحقش يمسكه و بردو خدوه تانى و منعوه يضربه 
- الولد فى حاله إنكار تام للواقعه كلها من أولها لأخرها - 
لحد ما جابوه لغايت عندى , خالى مسك ايديا الأتنين و انا بكلمه عشان عارف انى عايزه أضربه و لو عملت كده و هما واقفين من وجهة نظره إنى بصغرهم و كده عيب , المهم 

قولتله " أنت عارف أنت عملت ايه و كل الناس دى عارف انك كداب و انا ممكن دلوقتى ألبسك 3 سنين سجن و يبقى عندك سابقه أسمها تحرش فى حياتك , بس أنا خدت حقى بأنك دخلت بيت ربنا و أنت عامل كده , و خدت حقى قدام الناس دى كلها , رد و قالى : والله ما جيت جنبها ! 
قولتله هستنى قريب أوى تتسخط قرد بحلفانك ده يا كداب , و فى اللحظه دى جالى إنهيار و قعدت قوله أنت كدااااااااااااب 

فى أثناء كل ده كان فى ناس بتقولى امشى و ناس بتستهزأ بيا و تضحك و تمشى ,و واحد و أنا واقفه قدام الجامع جه قالى : صوتك بقى عشان عايزين نصلى , اه والله قالى كده !

و الوحيد اللى وقف معايا شاب جارى و رد عليهم و قالهم مش هتمشى دى صاحبة حق ياللى أسمكوا رجاله و أنا معاها و لو هيرضيها أنه يموت هموتهولها النهارده و راح جاب حديده و فضل واقف معايا .

بس أنا خدت حقى , و أهلى جابولى حقى , اللى أنا كنت متأكده انى لو روحت القسم حقى ده مكنش هيجيلى ..
الموضوع كان حساس شويه لأننا جيران , 
و برغم كده أنا مسكتش و جبت حقى أنه بان كداب و حيوان و هيمشى دماغه فى الأرض من كدبه و أعماله 

أنا أتعرضت للتحرش و مسكتش و مش هسكت .
مش هيجيب حق البنات غير البنات .
أرجوكِ متسكتيش عن حقك .

أنا زعلانه ...
....................

من شوية الرسالة دى اتبعتلى من استاذ ليا واخ 

حد ساعدنى كتيير جدا في قضيتي ووقف جنبي..

الرسالة دى استيت من بنت مش عندي في 

الفريندس ولا حتى اعرفها...البنت دى ناشرة الكلام 

دة على صفحتها...بعتلها واستأذنتها في نشر 

القصة على المدونة.. ماعترضتش بالعكس قبلت 

وبشدة بس كان عندها شرط واحد "ان الرسالة دى

تأثر في كل بنت وتخليها متسكتش تانى"...

متسكتيش دة حقك..متسبيش حقك..

تحية والف تحية للبنت اللى بألف بنت ........صاحبة

الرسالة :)

هاتى بوسة يابت..

بت هاتى بوسة يابت بت هاتى حتة يابت.....دى مش جملة تحرش مع انها بتستخدم كتير في التحرش..دى اغنية تسمي مهرجان..
انا لما قلت لناس كتير انى هتكلم في الموضوع دة ..قالولى بلاش لان الاقبال الشعبي على  الاغانى دى كتير وهيكرهونى ويكرهو مدونتى ومش هيتابعونى ..!! حقيقي ؟..! :(
بس مش دة المهم ..المهم انى هتكلم وخلاص..من واقع بشوفه..
انا مش عارفة من انهى تراث غنائي جات لنا الاغانى دي..بس مش مهم ان اى كلام فاضي يتقال مع موسيقي مزعجة يطلع نوع جديد اسمه مهرجان ..مش دة المهم..
المهم ازاى بتتوظف المهرجانات دى في الشارع...
ابسط مثال على التوظيف الفعلى ..هى اغنية الوسادة الخالية..الاغنية دى اتوظفت صح في التحرش بالبنات..يعنى البنت تركب تاكسي ..يبقي مشغلها السواق وشغال يغنى ويبص للبنت في المراية "بت هاتى بوسة يابت ..بت هاتى حتة يابت"..وبرضو لما تعدى من قدام محل مشغلها لازم يمشي وراها ويغنى الاغنية...!!
دة غير ان في اغانى قمة في السفهه والانحطاط الاخلاقي ..وفيها شوية احاءات وكلمات ..متتقالش حتى في سوق بلدي..دة ثراثنا الغنائي في الافراح واغانى الحنن موصلش لقمة "البجاحة" دى...
انا مش هقولكم متسمعوش لان دة في االاخر ازواق وانا مقدرش اتحكم في ازواق البشر ..اللى بيتحكم في كدا هى ثقافة المجتمع عمتا...
بس يريت لما يألفو الاغانى ..ميألفوهاش عشان يتحرش بينا في الاغنية وبعد كدا واحد يتحرش بينا من خلالها في الشارع ..
#ارحمونااااا ..

هوووووو دة...!

ازيكم عاملين اية..يارب تكونو كدا بخير...وخصوصا بنات مصر..لان بنات مصر مش دايما بخير...!
انهاردة انا هتكلم عن مصطلحات تحرش....زي "يامانجة.."قديمة اوى بس مستمرة..الشباب المصري بيحافظ على تراثة..
وماتيجي نيجي ونجيب مليجي..ودى احدث التعليقات في السوق..
نيجي بقا لتعليق وسطي ..كلنا شاركنا في وجودة.."هووووو دة"...بتاع لامؤاخذة نجم الجيل..تامر حسني....
طبعا تامر بيه حسنى..اول متحرش تحرش على شاشة عرض كبييرة وكلنا ضحكنا وسقفنا...الحقيقة الفنان تامر...بيبقي مصمم في كل افلامه انه يطلعلنا تقليعه جديدة للتحرش..
تبقي ماشية البنت في امان الله تلاقي الشاب جاى ويقولها "هووووو دة"...او "اكتر حاجة بحبها فيكي".....الكلمة دى خدت وقت مع الشباب واتعذبت بنات بسببها...كتيييييير..
انا نفسي وانا ماشية في الشارع اتقالى ياما "ط...يبة قلبك"...
اخص انا مش متخيلة ازاى شاب متحرش وبيألش كمان....
طب والحل..
اانا شخصيا مع احدث تعليقات تامر للتحرش ..مبقتش لاقية حل..وخصوصا ان في كارثة اكتر من كدا..
العيال الصغيرة.......! في الشوارع بيتحرشو بتعليقات تامر اكتر من اى حاجة تانية..الطفل الصغير كمان تلوث من حركة من حركاته....وهنتكلم عن الاطفال في نوت لوحدها بعدين...
خلينا الاول في تامر .....انا هواجهله رسالة..
يا تامر بية حسني ..احنا كلنا مقدرين ان دمك اهــ..ولا بلاش اهله ملهمش ذنب...
ان دم حضرتك خفيف...بس يريت تخف دمك بشكل تانى...ومطلعلناش كله مرة تعليقة جديدة للتحرش تتعذب بيها البنات سنين....!او اقولك متخفش دمك خالص..وطبعا مقدرش مواجههش "الشكر"..لشباب مصر الجميل..اللى بيقلد كل حاجة....!!
انا خلصت.....!
مع عدم الاعتزار لتامر لامؤاخذه حسني...!

رسالة من بنت

انا هنقلكم الرسالة زى ما جتلى على الان بوكس بالظبط..وزى ما قلت ان المدونة هتعرض كل رسالة من بنت هتجيلي عن التحرش..
..................................................

أسوء شئ ممكن تتعرضله اي انثي هو التحرش بكل انواعه

انا بنت زي اي بنت اتعرضت لتحرش بأكتر من طريقة

طبعا اسوأ شئ واسوأ احساس ممكن تحسه اي بنت بعد التحرش ده رغم ان ملهاش ذنب

موقف من المواقف اللي اتعرضت ليها مش من يوم ولا من شهر دي من سنين

كنت بسافر كليتي عادي مع زمايلي وكنا متعودين نركب قطر معين عشان نقدر نركب فيه وخصوصا ان السفر بدري بيكون صعب في المواصلات لأن اغلب الطلبة بيسافروا في الوقت ده

استنيت انا وزمايلي القطار مجاش في ميعاده فكنا مضطرين اننا نركب اللي بعده اللي مبيبقاش فيه مكان انك تقف حتى مش تقعد

المهم اضطرينا وركبنا وكنا بنتحشر طبعا ركاب قطارين بيركبوا في قطار واحد (القطار اللي ركبناه ده بيسافر بين المراكز للأسف غير آدمي من جوه هو يشبه قطار أبو قير الموجود في اسكندرية  لكن كان بيسافر بين ايتاي البارود واسكندرية ) المهم ركبنا طبعا في ناس مننا واقفة على رجل واحدة القطار اتحرك مشينا طبعا الناس متلزقة في بعض متعرفش تتحرك من مكانك طبعا في وسط الزحمة انا واصحابي تهنا من بعض كل واحدة على ما عرفت تدخل في مكان ووقفت فيه فكل واحدة في حته مش جنب بعض نقدر نتسند على بعض

جه واحد طويل عريض شنبه في وشه مغطي نص وشه بس للأسف دا (اقل من اني اقول عليه راجل بعد اللي عمله) جه ووقف طبعا انا مجيش نص طوله وقف شوية شوية بيمد ايده ابتدى يمد جسمه ويحك نفسه فيا عليت صوتي عليه وقولتله انت انسان مش محترم فطبعا اللي في القطر بس في ايه ابعدي انتي عنه والبنات اللي ميعرفونيش ابتدوا يشدوني وخلوني قعدت على رجل واحدة طبعا الموقف استفذني جدا انتوا بتشدوني وتقعدوني طيب غلطوه قولوله اي حاجة عاقبوه لا انا اللي غلطانه انا اللي مجيش نص طوله ولا نص سنه حتى يقولولي كده  طيب ماهو كل يوم بيركب القطار وممكن يعمل كده مع كل واحدة يشوفها

طبعا موقف مقزز واليوم ده كان عندي امتحان مش عارفة اوصف احساسي كان ازاي

شعور مقزز جدا ومقرف جدا...
..............................................
تعليقي :..
انا حاسة بيكي وحاسة باللى انتى حسيتي بيه...وحاسة كمان اد اية انتى أتالمتى ان مجاش حقك لما لمسك جسمك..احيكي على انك بعتيلي شكرا وشكرا لكل بنت ..بتحاول تواجهه المجتمع ب"مرضه"...

ولا يهمك المس جسمي..

كل ماأتكلم عن موضوع التحرش في اى مكان لازم الاقي الشخص ده..."التحرش دة مشكلة مجتمع بأكمله مشكلة بطالة وشباب مش بيشتغل وشباب مش لاقي فلوس عشان يتجوز فبيتحرش"..
الشخص دة موجود في كل مكان اى حد يتكلم فيه عن التحرش..
انا كلامى هيكون للشخص دة..لكل شخص شايف المنطق دة مبرر للتحرش..لكل واحد شايف ان التحرش اصلا له مبرر..
انا مبدأيا هوافقك في كلامك وهقولك ..اه المجتمع بتعنا "تعفن" من كتر الامراض اللى فيه  زى"مفيش شغل ..مفيش فلوس..وحتى لو في شغل مفيش فلوس..قناة التت ...:D "كل المشاكل دى بيواجهها فعلا مجتمعنا ..بس...
 هل دة مبرر ان امشي يتلمس جسمي..ويطلب نمرتى ..ويتقلى في ودانى كل الكلام الأبيح اللى مينفعش أسمعه..!!
هل دة مبرر ان كل بنت في مصر تفكر ألف مرة قبل ما تنزل الشارع.!!
هل دة مبرر ان كل بنت في مصر متحاولش تنزل في العيد...!
هل دة مبرر ان كل بنت في مصر وهى نازلة لكليتها او لمدرستها او للدرس تنزل شايله الهم..!!
هل دة مبرر ان كل بنت في مصر تتمنى انهم يتكلمو بس وميلمسوش جسمها..!!
...انا هقول مثال مع ان انا اكتر حاجة بكرهها في حياتى انى اقول مثال عن التحرش لأن التحرش مينفعش يضرب بيه أى مثل..بس هقول وأمرى لله..
لو كانت السرقة مبرر للجعان..!!! فأنا همشي كل يوم اقول للشباب أتحرشو بيا....!
..............
انا خلصت كلامى والمجتمع لسه برضو "متعفن "....اوعو تحلو مشكلة التحرش ..وأوعو تحلو المشاكل ولا تلمسو البلد...
ولا يهمك يا سيدي المس جسمي انا..........!

هبه في القطر

زى ما قلت ونوهت قبل كدا المدونة هتعرض قصص حصلت لبنات فعلا ..وحكايات حصلت معايا او شفتها بعيني...شكرا لكل بنت شاركت واجتهدت انها تشارك في تسليط الضوء على جرح المجتمع"التحرش"..وعاوزة اقولكم انها عشان توصلكم حكايتها افتكرت جروح والام مرت في حيتها ومكنش سهل عليها انها تفتكر ....ولا كان سهل عليا انى اسمع او اقرا الحكايات..المهم اننا في الاخر وصلنا الحكاية فأرجوك وانت بتقرا بلاش تعمل الحاجات دى (تستهزأ..تكدبنا...تحقر مننا...او تقفل الصفحه في اول الحكاية..
كملها ...اسمعنا..حس بينا..حل المشكلة........!
نبدأ بقا الحكاية ....
الحكاية بدأت وهبه رايحه الكلية بتاعتها...في اسكندرية ركبت القطر..قالتلى ان مكنش في في القطر مكان فواحد قام لها وقعدها..شكرته وابتسمت وقعدت مكانه.."طرقة" القطر مكنتش مليانه اوى ...بس هو وقف جنبها ...هى استغربت بس محبتش تقدم سوء النية ولا حتى تكلمه لانه هيبقي من قلة الزووق انها تقوله امشي من جنبي متقفش لانه هو اللى قام وقعدها...المهم...انها قعدت والقطر مشي وفي الطريق هبه حست بيه بيقرب منها في كل فرصة..بصتله لقيته مش باصص لها اصلا...فبصت في الارض ومتكلمتش..المهم انها حست بأديه بتلمس كتفها...بصتله بغضب جدا ..بصلها بلا مبالاه...وفي نص الطريق والوضع مستتب في القطر حست بحاجة غريبة جنبها بصتله لقته فاتح سوسته البنطلون..وايده عليها...وقرب منها جامد ولمس جسمها...هبه اتخضت جدا..وعيطت وكان في واحد جنبها..قالها مالك قلتله اصلي افتكرت حاجة .....! ممكن اقعد جنب الشباك قلها اتفضلى ....! وقعدت مكانه ..وطول الطريق بتعيط...ومش قادرة تعمل حاجة...نزلت من القطر وراحت الكلية واليوم عدى ...بس ذكراه متنستش...
هبه انهاردة رائدة من رواد محاربة التحرش..هى صديقتى كمان حبيت أبدأ بقصتها ...!:)
شكرا هبه وشكرا لكل بنت حصلى تحرش ومسكتتش وحاربت عشان بنت تانية ميحصلهاش..

تعليق على تعليق.

غالبا ما هيكون ردى على تعليقات قراء المدونة ..في نوت خاص..لان الأمر لا يتحمل انى ارد عليه بشكل شخصي على تعليقه..زى ما قلت ان المدونة ااتعملت لطرح مشكلة التحرش "بكل شفافية"...
كل القصص والحكايات اللى هتتحكى هنا هتكون مواقف حصلتلى انا او مواقف لبنات بعتولى قصصهم او لمواقف حصلت قدام عيني..
انا زى ما قلت انا مش عاوزة حلول حل المشكلة بينك وبين نفسك اعمل مجموعة عمل وحل المشكلة..مشكلة..!!! هو انا بتكلم عن مشكلة انت لسة مكونتش الصورة عنها كاملة..كون الصورة كاملة من كلامى ..التحرش مينفعش تبص عليه من بره عيشة معايا..ايييوة ريلاكس كدا وعيشه معايا.."عيش مأساتى"..
..........................انا جالى التعليق دة من صديق المدونة .:D زى صديق البرنامج كدا :)

Bofon fc9 يناير، 2013 11:25 م

(انا شايف ان فى مبالغه وواضح من الصور ان لبس حضرتك محترم و مفيش حد اكيد  

بيعاكس واحده لبسه لبس واسع و محترم غير لما بكون شخص شاذ و مش محترم لكن لو 

حضرتك بقى بدافعى عن كل البنات و اى نوع لبس فاكيد حضرتك مش فاهمه ان فى 

بنات اصلا بتنزل بلبس غير محترم علشان تتعاكس و متعرفيش ان فى بنات بتسلم 

جسمها للولاد علشان تحس بجمالها فقط و علشان يحولها رصيد و الكلام الى معروف لا 

تجعلى قضيتك للكل ان تتكلمى عن فئه شاذه فالمجتمع و هم من يقوم بمعاكسة الانسانه 

المحترمه لكن بقى موضوع ان كل واحد يشوفك يضحك و عايز يكلمك انا اشك فان 

حضرتك ببتكلمى عن واحده لبسه محترم لكن بقى موضوع واحده محترمه ولبسه مش 

محترم وتقولى حريه شخصيه هو الاخر يقول انها حريه شخصيه)...
.................................

(تعليقي)....

مبدأيا حضرتك اول ما دخلت المدونة وعرفت انها عن التحرش و

وقريت الموضوع بصيت على صورتى..دة غلط لان انت بتحكم 

عليا من اية من لبسي......!! دة اولا..

ثانيا بالنسبة لمدافعتى عن اى بنت لابسة اى نوع من اللبس فأنا اه 

بدافع عن اى بنت لابسة اى نوع من اللبس..لان هو دة المنطق 

اللى بيتعامل بية المتحرش مع الأمر انها لابسة لبس مش محترم

مع انها ممكن تكون لابسة محترم وبيقول كدا عشان يبرر..

تحرشة....(دايرة مغلقة)...!!!

ثالثا :بالنسبة لنماذج البنات اللى حضرتك قابلتهم من انها بتبيح

عشان تعرف انها مرغوبة وانها بتطلب شحن..!!! فأنا مليش 

تعليق عليه لانه مش موضوعى للأسف..بخص "بوليس الاداب 

اعتقد"...

وعن موضوع ان كل واحد يشوفنى يضحكلى وعاوز يكلمنى..

فأنا مش فاهماه مش هرد عليه...

اما عن الحرية الشخصية..فعمر ماكانت الحرية الشخصية هى

لمس جسد مرأة "لأي سبب في الدنيا"....

الموقف اللى حضرتك قريته وشفتنى مبالغة فية اوى دة ..موقف

حصلى فعلا وحصل لميت بنت زى ..بس الفرق انهم متكلموش

عشان معندهمش صور زى على المدونة يأكدو انهم بيلبسو محترم..

..................................

شكرا لمرورك...:)

كلنا توتو

جتلى فكرة وغيرت أسم البلوج وخليته "انا والشارع (عن التحرش أتحدث)..عشان اخونا البعدا اللى مش بيحبو كلام في الموضوع دة وبيعتبروه" يع"..ميدخلوش اصلا..يلا واهو كله بثوابه..:D
المهم ندخل في موضوعنا...
موقف بتتعرضله اى بنت مصرية....ركز معايا.
............
طالعه من الكلية انا وصحبتى (طلبت منى ماقولش اسمها هى اسمها هبه بالمناسبه ).:D في أمان الله واانا ولا بيا ولا عليا وماشيين في الشارع اذ نفوجأ ..بشاب راكب عربية اسود في اسود متفيمه اسود على دماغه.شاب من الشباب اللى هما كل ما تشوفهم دول تبقي عاوز تقولهم "يافرحة امك بيك"....ماشي جنبنا خطو بخطوة وبشويش ...المهم انا قلت عادى يمكن بينام وهو سايق ولا حاجة...بعد شوية هوووب لقيت الباب اتفتح قدامى..انا قلت عادى يمكن فتح غصب عنه..ولقيت الكابتن بيبسبس ..."بس بس"..مردتش عليه.."طب بس تعالى اركبي ونتفاهم"..
انا اتصدمت ..(خلو بالكم هتلاقونى بتصدم كتير في الحكايات )..:D بصتله وقلتله بصوت عالى جدااا .."امشي مشش في ركبك"....الواد متخضش راح  قايلي"انتى حره يا فقر"...اه اه انا الفقر دى :D
بصيت لصحبتى وقلتلها هو اللى حصل دة حقيقي قالتلى اه حقيقي ...:(
المهم تابعت العربية يعيني لقيته مشي قدام ووقف عند شلة بنات برضو وعمل نفس الحركة ..البنات بصوله بقرف ومشيو...وخد طول الشارع فتح باب العربية وقفلها.....
........استنتجت اية بقا من القصة دى.
انا اقولك ....استنتجت ان كل بنت ماشية في الشارع بتلعب دور "توتو"..في فيلم راندفو..الى ان يُثبت العكس....(كلنا توتو)...
واحد بقا فطن هيقولى ما في بنات بتركب....وماله انا هوافقك وهقولك ان في بنات بتركب..ماااشي ياعم..
بس البنات دى بتبقي طالعه من كلية..من درس ..نازلة من بتها ....ماشية في الشارع ..طالعة من نادى ..طالعة من محل..!!
من حقي امشي ففي الشارع ميتفتحليش باب عربية...لمجرد انى ماشية في الشارع بس مش بعمل اى حاجة تانية..
"انا مش توتو..والبنات اللى ماشية في الشارع مش توتو"...
انت اللى لامؤاخذة "توتو" ..:)

لابسة مايوه

صحيت الصبح ..والجو كان جميل متقلوليش ساقعه ولا حاجة..لانه جميل وصيف اهو.(متاخدوش على كلامى واصبرو للاخر)..

لبست المايوه القطعتين بتاعى لونه احمر مخطط بأسمر..المهم لبسته ونزلت الشارع..متجهه للكليه بتاعتى في اسكندرية..
رحت على موقف الاوتوبيس.لقيت شاب بيقولى اية يا مزه الكلام الجامد دة..بصتله بقرف وعديت ومشيت..

وقفت استنى الاوتوبيس لقيت شله شباب جايين يقلولى لا بس.(......) جامد اوى اوى الصراحه..
متكلمتش ولا بصيت ...وسكت..ووقفت استنى الاوتوبيس تقريبا ربع ساعه وانا بسمع وصف لكل جسمي..قلت عادى ما انا لابسه مايوه بقا..:D
استنيت وطلعت الاوتوبيس ركب جنبي شاب كان واقف تحت ومطلعش الاوتوبيس غير في الاخر ومعرفش لية (الكلام دة سر متقولوش لعماد ;)...
المهم الشاب جه وقعد جنبي قلت عادى ..حطيت الهاند فري بتاع الموبايل وقعدت اسمع اغانى...لقيت الشاب بيضحكلى ..استغربت جدااا.بس طنشت..لقيته بيضحك اكتر قلت اية دة وانا وشي مضحك اوى كدا ..:D
لقيته بعد شوية بيقولى ضحكتك حلوة اوى ..اتصدمت بقا ..:O
قلتله نعم حضرتك بتقول حاجة..! قالى على فكرة انا مش بعاكس (امال بيعمل اية بيقرا أيتين قرأن)...ولا همه الدبلة ولا همه المايوه :D  ولا همه اي حاجة..طلب نمرتى بكل بجاحة على اعتبار انى ممكن ادهاله برضو عادى جدا بنفس البجاحة.
المهم بعد وابل من الشتيمة بيني وبينه وبين الناس والغريبة ان كل الناس بتقولى حصل خير وخلاص بقا وهو عمال يقولى انتى مفكره نفسك مين  غيرو مكانى وقعدت جنب بنت..وانا محروق دمى جدااااااااا ومخنوقة...
وصلنا اسكندرية ونزلت من الاوتوبيس لقيت نفس الشاب بيبصلي ويقولى متفكريش نفسك حاجة يعنى احسن منك وبيجيبو نمرتهم...
سكت ومشيت وكملت للكلية بتاعتى ..وانا لابسه المايوه وكل واحد بيقول وصفه لجسمي من وجهه نظره...طبعا بما انى لابسه مايوه في الجو الحر دة...وبس ياسيدي ووصلت الكلية...
(تنويه للاذكياء فقط: طبعا انا مكنتش لابسه مايوه ولا حتى لابسة مبتذل دة انا رايحه كلية الساعة 10 الصبح يا جدعان:D ...بس المايوه اللى انا لابساه دة لابساه في عين كل شاب بيوصف جسمي وبيبصلي في الشارع)..
ولسة اللى جاى احلى .....انتظرونى :D

ابتذال

بعد ما اتكلمنا عنى وانا ليه عملت المدونه..نبدأ بقا نتكلم في المفيد..
هبدأ لكم بكلمه بتسمعوها كتير جدا الايام دى بالذات بما أن مصر بقت "بدقن"..
هى "الابتذال"..

ماهو معنى الابتذال.."[ ب ذ ل ]. ( مصدر اِبْتِذَلَ ). " عَرَّضَ نَفْسَهُ لِلابْتِذَالِ " : لِعَدَمِ الحُرْمَةِ وَالاحْتِشَامِ ، كَوْنُ الشَّيْءِ مُبْتَذَلاً ."

دة نقلا عن جوجل مش عنى.:D
المهم نستفيد من الكلكعه دى ان الابتذال يعنى الحاجة كدا اللى بتبقي "لأامؤاخذة يعنى"..
يعنى اية البنت لابسة مبتذل ..يعنى لابسة ضيق او قصير او مبينه استغفر الله العظيم جسمها ..:D
وفي الحقبة التاريخية اللى بتعشها البنت المصريه حاليا ..أصبحت الفتايات المصريات كلهن ...مبتذلات..
لابسة بقا مش لابسة بحجاب بقا مش بحجاب..وحتى لو بنقاب.
كلنا مبتذلات...!!
لأن المتحرش بيبرر موقفه بكدا ان البنت دى مبتذلة جدا ..وبصراحة يعنى مقدرش فتحرشت بيها..
دة معنى الابتذال في العادى والمعنى دة اصبح مبرر للتحرش..
انا هعرض عليكم بقا معنى الابتذال عندى....وعند بنات كتيير زي...!!!
اية هو الابتذال .......أسمع يا سيدي ....!!
الابتذال مش انى ألبس ضيق..الابتذال هو انك تبص..!!
الابتذال مش انى امشي في الشارع...الابتذال انك تلمسنى وانا ماشية في الشارع.!!
الابتذال مش انى اقعد في كافيه مثلا ...الابتذال هو انك تطلب رقمي بكل بجاحة..!!
الابتذال هو انى مش اعمل اكونت على الفيس بوك واحط صورتى..الابتذال هو انك تبعتلى وتتحرش بيا ولما ارفض واشتمك تبعتلى تقولى امال عاملة اكونت فيس لية..!!!
الابتذال مش انى اشتمك واقولك يا ابن الكلب..الابتذال هو انك تلمسني وتطلب منى اسكت..!!
الابتذال مش انى ارد على نمرة غريبة في موبايلي..الابتذال انك لما تلاقيني بنت تصمم تكلمنى ولا كأنى كنت واقفة جنب عامود في جامعة الدول...!!
(الابتذال مش انى بنت...الابتذال هو انى مصرية)..

بعد البداية

مكنتش اتوقع ان الردود على المدونة هتكون بالسرعة دى..بعد كام ساعة من كتابة "البداية".
الناس بدأت ترد وخصوصا البنات..جالى ردود طبيعية من بتاعة ربنا معاكى .والى الامام ولاكأنى بلعب ماتش تنس مستنيه اجيب جون..
المهم.
ان الردود اللى عاوزة اعلق عليها هى "انتى جريئة اوى".ويابختك بجرأتك ..قدرتى تقولى انك اتعرضتى لتحرش كدا عادى..!!
انا مش جريئة ولا ياباختى بجرأتى..كل ماهنالك انى حسيت بمشكلة وبحلها..
انتى اتعرضتى لتحرش زي..مستنيه ايه تانى عشان تتكلمى..!!
مستنيه لما بنتك تتعرض لتحرش لا وممكن يغتصبوها كمان..اه طبعا يغتصبوها ماهو اكيد التحرش دة هيمر بمراحل تطور مش هيفضل تحرش كدا على طول..
اتعلمت ان اول خطوة في علاج المرض هو الاعتراف بالمرض نفسه..
عاوزة تعالجى التحرش اعترفي بيه واعترفي انك اتعرضي له..
وبعدين انتى خايفة اوى لية كدا..انتى مجنى عليها مش جانى..يعنى مش ذنبك ان في واحد اتحرش بيكي ..بس ذنبك انك سكتى لما واحد خد حاجة منك مش من حقه ياخدها..
خدى الخطوة وخليكي معايا لمدة دقيقة..انتى اتعرضتي لتحرش قولى ورايا "انا اتعرض لتحرش." ....برافو عليكي..
تانى خطوة.."اانا مش هسكت تانى"....!
الموضوع بسيط انا اتعرضت لتحرش ..انا مش هسكت تانى...
تانى حاجة عاوز اعلق عليها...هى موضوع خطيبي..
اه انا خطيبي عارف بكل خطواتى وبيساعدنى ولا كأنى داخلة الاولومبياد برضو ..:D
لانه ببساطة مؤمن ان البنت ضحية وانها مش لازم تسكت..
والحمد لله هو متفهم جدا كون ان مراته المستقبلية اتمرمطت تحرش ..
متزعلش اوى كدا .... بطل تحرش انت كمان .....
اتفهم يا استاذ انت وهو لان دى حقيقة مش هتقدر تضحك على نفسك بعكسها..

البداية

البداية

مش عارفة أبدأ منين ..ولا حتى أقول اية..بس هبدأ بجملة يمكن سمعتوها كتير..
أنا بنت أتعرضت لتحرش..
ايوة يا كابتن مستغرب انى بقول ولا مستغرب انى اتعرضت لتحرش..
المهم..
بما ان انا اتعرضت لتحرش وبما أن انا رافضة انى اتعرض لتحرش وبحارب دة.اخدت خطوات ايجابية قبل كدا..
اول خطوة اخدتها انى بصتله بقرف جدا لما اتحرش بيا "محدش يشتم دى كانت اول خطوة بقول"..
تانى خطوة اخدتها انى اعترضت جدا جدا وزعقت وقلتله انت "ابن كلب"..الحق يتقال ان الناس في الشارع مسكتوش ووقفو في وشي وقالولى "عيب يابنتى تقولى ابن كلب دى"...
تالت خطوة اخدتها ودى اهم خطوة بقا انى عملت محضر..عملت قبل كدا محضرين في اتنين متحرشين ومعرفش لحد دلوقتى حصل فيهم اية لأنى متابعتش المحاضر ولا حتى الحكومة تابعت المحاضر ..اعتقد ان كل اللى حصل فيهم ان اللى اتحرشو بيا لسة بيتحرشو..
واجهت ودافعت عن القضية كتير وشاركت في حملات كتيييييير لدرجة انى عملت لوحدى حملة مرة ...والحمد لله "متغيرش حاجة"..

بحاول اعمل مشروع كامل ضد التحرش..في الوقت دة..
محضر .وزعيق.ومدونة..ومشاركة.ومؤتمرات.ونزول الشارع وبادجات..وكل اللى حصل في القضية ان الناس عرفت ان في تحرش بس..مفيش اى جديد حصل فيها..
حتى باسم يوسف مش عاوز يعمل حلقة عنها .:D
فأنا قررت انى أدون ومش منتظرة حل ..انا منتظراكم تقرو يومياتى..