شنبات الفيسبوك ..

البوسة التى هزت نخوة الفيس بوك ...

على اد ما الموضوع مستفز .. بس هاجى على نفسي واعصر على نفسي لمون (ولا بلاش لمون)... وهتكلم في الموضوع ..
اصدقاءناا البعدا على الفيس بوك مش مبطلين تشير لصورة .. محتواها (واحد وواحدة بيبوسو بعض في شوارع القاهرة ).. تمام
كدا الصورة خلصت نعلق بقا ..
اولا : الصورة مش باينة فين غير وراهم اعلان بيبين انها في القاهرة بس فين بالظبط مش عارفين يعنى ممكن تكون في مكان مدارى اصلا .. يعنى كل التشير على انها في الشارع وفي العلن كل دة "حمادة" ...
ثانيا: في ناس نزلت الصورة على انهم اتنين بيدعو للحرية .. وانهم بياخدو حقهم من الحرية ..!! مين دول .. فين دول .. عملو اية دول ولا اى حاجة .

يعنى من الاخر الصورة اى كلام . اتنين تافهين عملو فعل تافهه .. وكل اللى قدرو يواجهه بية المجتمع دة لو عاوزين يواجهو المجتمع اصلاااا .. صورة تافهه على الفيس بوك ..

تمام ادى حكاية الصورة خلصت ..

نيجي بقا للتعليقات ... :) ومااداراك ما التعليقات .. في ساعتها العرق نط والشنب اتبرم .. والعنين احمرت .. وكل الالفاظ البذيئة اتقالت .. دة انا لو شفتكم يا ولود #$%%^^$$$ هعمل وهخلى وهسوى .. دة انا لو شفتك يا بت الـــــ..... هيبقي نهارك مش عارفة لونه اية .. !!
واديني بقا من التعليقات دى كتييييييييييير وسطور والوان ..وشتيمة وتوعد ..!!

عزيزي المعلق ..:)

مبدأيا انت حر طبعا في رأيك .. ومن حقك طبعا المشهد يستفزك على اعتبار انك مش بتشوف أسوأ منه.... وتسكت :D
ومن حقك كمان تعبر عن رأيك بالطريقة الملائمة ليك ولتربيتك ..برحتك يا برنس ..
بس انا عاوزة اسألك سؤوال ووحياة العرق الازرق اللى نط في رقبتك دة لترد عليا بصراحة ..!
لما بتلاقي بنت ماشية في الشارع وبيتحرشو بيها  بتتحمق اوى كدا ؟..!!
لما بتلاقي بنت بتشتم ولد وبتضربة ساعات عشان لمسها بتاخد موقف اوى كدا ؟..!!

انا بقا ارد عليك ...

لماا بنشير على لفيس بوك صورة واحدة بيتم التحرش بيها .. بتلاقي حضرتك واصدقاءك من شنبات الفيس بوك بيعلقو تعليقات زى " شوفي لبسها .. شوفي شكلها .. دى بتضحك .. البنت بتحب يتحرشو بيها .. البنت اصلا لبسها مستفز .. وهى اية نزلها "..
وخد عندك من دة كتير ...

عارف بقا انت لية رديت على الصورة الاولى كدا ولية بترد على صور التحرش كدا .؟.

عشان انت مجرد شنب فيسبوك عارف ان الصورة الاولى صورة تافهه .. وعمرها ما هتحصل في الحقيقة..
بس عشان الصورة التانية بتحصل كل يوم وقدام عنيك وانت مش بتتكلم .. فبدور على تبرير ترضي ضميرك بية ..

ترضي ضميرك بية .

ترضي ضميرك بية ..

(تكرار الكلمة الاخيرة دة كان صوت ضميرك )..

احم احم .

عمتا انا خلصت كلامى سلاام .:)

بعد التحرش..

معلش اتاخرت عليكم شوية ..اصلي كنت في الميدان بيتحرشو بيا وبيغتصبونى...!
فاكرين لما اتكلمت عن التحرش وقلت ان التحرش عمره ما هيقتصر ويبقي تحرش بس وان التحرش في تطور مستمر...(مش فاكر ..طب معلش اعمل نفسك فاكر :D )
اانا فعلا قلت كدا ..وقلت ان التحرش دة مرحلة بعد كدا التحرش هيبقي اداه ووسيلة وهيتطور يبقي اغتصاب..
وهو دة فعلا اللى حصل ..التحرش اصبح وسيلة واداه في أيد السلطة..يعنى التحرش "أتسيس"..افرحو يابنات..
التحرش بقا في السياسة وبقي اداه لقمع التظاهرات ..زى قنابل الغاز كدا والخرطوش..
الاغتصاب على مر السنين كان اداه للمستعمر لما يبقي عاوز يسيطر على البلد ..ويذل الرجال..ايوة "للمستعمر"..
بس احنا مش في بلد مستعمره ..ولا مستعمره !! والله ما عارفة..
المهم ان التحرش في بلدى ..بقي اداه لقمعى وذلى وكسر عيني..
اتفرجت على كل بنت اتكلمت عن التحرش واللى حصلها في التلفزيون وقصص قلع البنطلون وتقطيع الهدوم..وفي كمان حالات انتم متعرفوش عها حاجة ومتكلمتش ووصلت لمراحل اصعب من كدا بكتييير لاان حصلها اغتصاب فعلا.بس كنت فخورة بيهم وحزينه عليهم..!
فخورة لانهم اتكلمو وقالو ومخافوش..وحزينه لان بقي في اداه بالقزارة دى ضد المطالبة بالحريه والحق..
وطبعا مش محتاجة اطالب بان الفعل دة لازم نقاوموه بكل طريقة ممكنه..بس متفقدش انسانيتك برضو..
واخيرا ...
انا مش عارفة اقول اية ..غير انى مش هسيب الميدان ..:)
موتو بمرضكم النفسي..p:

نظرية البونبوناية..

انتى بونبوناية او مصاصة..يعنى حسب مزاج الشيخ اللى بيتكلم..المهم انك حالة حلوة بتتتاكل فلازم تتلف كويس عشان تتقدم صح للى هياكلها..اه والله بجد دة كلام حقيقي اتقال عليا وعليكي ..على البنات عموما...
بيقولو ان المصاصة "المتعرية"..عشان هى حلوة وبطعم اللمون بيعف عليها الدبان الكتييير..بس المصاصة "اللى مش متعرية"..عشان هى احلى بقا وبطعم الفراولة محدش بيقدر يلمسها لانها ملفوفة....
ايهما تشبهين.؟؟ المصاصة اللى بالفراولة ولا المصاصة اللى باللمون...!! ممممم
اد كدا انا قدرى رخيص ..ولم ارقي حتى لو كونى نص انسانة فأنا مجرد مصاصة او جوهرة او بونبوناية وانت كمان مجرد "دبانة"....
وبعد اكتشاف هذا الاكتشاف العلمى الرهيب ان البنت مصاصة ..اكتشفنا انها لازم تتلف..يعنى لازم تتلفي في غلاف صلب جامد عشان ميوصلكيش اتربة او دبان او ناموس او اى حاجة من اللى بتطير في الهوا دى..وعشان كمان تتاكلى بشهيه وميجيش للى بيكلك تسمم غذائي...!!!!
وعشان نطبقو الاكتشاف على ارض الواقع هنعملولك عربيات خاصة بيكي واتوبيسات خاصة بيكي ..وتبعدى عن الدبان قصدي الرجالة..وهما كمان يبعدو عنك لحد ما يختارو طعم ياكلوه ...
................................
انا مش بونبوناية او مصاصة او جوهرة .انا انسان بحس وبتألم وبفرح وبزعل..وليا اختيارات لان ربنا خلق جوايا قلب وعقل زي زيك وهيحاسبنى على فكرة على اختياراتى .مخلقش جوايا لبانه بتعمل بلونة كبيرة..!!!!
وبسبب حلكم االعبقري واكتشافكم الرهيب اكتشاف ان في الاخر البنت طلعت "مصاصة "..بس متنكر في شكل انسان حصلت الحاجات دى............
*البنت لما بتتكلم في الشارع وتطلب حقها بتلاقي الف صوت يقلولها اسكتى انتى بنت مينفعش تتكلمى..
*النت خافت تقول لاهلها انها حصلها تحرش لانهم هيعملوها بمنطق البنبونى اقعدى بقا في البيت..

*البنت بقت بتستقبل التحرش على انه شيء عادى ويومي في حياتها بما انها اختارت تكون المصاصة رقم 2..اللى بيعف عليها الدبان ...
*البنت بقت تشوف لبس يعجبها ..تكتشف نظرية المصاصة فتتراجع عن الفكرة من الاساس..
*الشباب بقو يمشو في الشارع يقولولها ياحلو يا سكر..منكم لله..
.....................................واخيرا..
ان كل واحد بيشوفنى مصاصة بطرقته..يعنى واحد بيشوف بنت بشعرها مصاصة عريانة..وواحد بيشوف بنت محجبة حجاب عادى..مصاصة عريانة..وواحد بيشوف واحدة منتقبة برضووو مصاصة عريانه..لان كل واحد وزوقة في المصاصات...!!
يريت تقعدو مع بعض وتحطو شروط للمصاصات العريانة ونوع الغلاف اللى هيحميني من "الدبان".............!!!
..............................
انا خلصت اقفل بسرعة بقا احسن اسيح ...:D 

متسكتيش..

اليوم : الخميس 17/1/2013 
المكان : تحت بيتى 
الحدث ,,

كنت جايه من برا و فى شارع بيتنا و تحت العماره لما " تم التحرش بيا " 
واحد جه عدا من جنبى و أتحرش بيا و قرر يمشى و لا كأنه عمل حاجه ,, و أنا قررت أنى أخد حقى . 
بدأت أزعق و أقول " أنت فاكرنى هسكتلك و هسيبك , تعالى هنا , أنا بكلمك , و هو يمد بسرعه لحد ما دخل " الجامع " - الجامع بعد مدخل العماره بالظبط - 

أه والله دخل الجامع يصلى بعد ما أتحرش بيا ! 
بدأت الناس تيجى على الصوت - اللى هما أهل شارعنا اللى كلهم عارفنى - و قلتلهم على اللى حصل , بدأوا يقولولى كلام من نوعية " طيب أطلعى بيتك و أحنا هنجيبه , متشوشريش على نفسك , امشى " 

شتمتهم و قلتلهم أنا واقفه قدام باب الجامع لغايت ما يطلع , يورينى هيمشى إزاى والله ما هسيب حقى - و هو مستخبى جوا الجامع -

الناس عملت كل الطرق الممكنه عشان أطلع بيتى و أمشى , و أنا مكنش عندى غير كلمه واحده , هاتهولى من جوا الجامع !
جابوه , أول ما طلع لسه بقرب و هضربه مسكونى و منعونى , و هو قال بالنص " والله ما عملتلها حاجه بمنتهى البراءه " فضلت أقوله أنت كداب و هما يمنعونى عنه لحد ما خدوه من قدامى و دخلوه الجامع تانى !
- كل ده و أنا لوحدى - 
ثم , ماما نزلتلى , الناس كترت أكتر , أبوه جه و جابه من جوا الجامع و جاى عليا أنا و ماما و بعد ما عرف فيه ايه كان ده رده و رد كل اللى واقفين 
" ابنى أنا ؟ أنا ابنى من البيت للجامع و من الجامع للبيت إستحاله يعمل كده , و لو عمل كده أكيد غصب عنه " ماما بدأت تزعق و أستمرينا كده شويه 
و بعد ما أبوه حس أن ابنه غلطان و فيه رجاله جايه و انى مش هسيب حقى طلع أبنه البيت يستخبى 
لحد ما بابا وصل و خلانى و رجالة العيله كلهم و رفضوا الكلام مع اى حد غير لما الواد يجي - فى هذه الأثناء و مع وصل الرجاله , لهجة كل الناس اللى كانت واقف أتغيرت تماماً من الهجوم و السخريه لـ أحنا آسفين , و حقك علينا و ايه اللى يرضيكى - 

لحد ما الولد جه و خالى ملحقش يمسكه و بردو خدوه تانى و منعوه يضربه 
- الولد فى حاله إنكار تام للواقعه كلها من أولها لأخرها - 
لحد ما جابوه لغايت عندى , خالى مسك ايديا الأتنين و انا بكلمه عشان عارف انى عايزه أضربه و لو عملت كده و هما واقفين من وجهة نظره إنى بصغرهم و كده عيب , المهم 

قولتله " أنت عارف أنت عملت ايه و كل الناس دى عارف انك كداب و انا ممكن دلوقتى ألبسك 3 سنين سجن و يبقى عندك سابقه أسمها تحرش فى حياتك , بس أنا خدت حقى بأنك دخلت بيت ربنا و أنت عامل كده , و خدت حقى قدام الناس دى كلها , رد و قالى : والله ما جيت جنبها ! 
قولتله هستنى قريب أوى تتسخط قرد بحلفانك ده يا كداب , و فى اللحظه دى جالى إنهيار و قعدت قوله أنت كدااااااااااااب 

فى أثناء كل ده كان فى ناس بتقولى امشى و ناس بتستهزأ بيا و تضحك و تمشى ,و واحد و أنا واقفه قدام الجامع جه قالى : صوتك بقى عشان عايزين نصلى , اه والله قالى كده !

و الوحيد اللى وقف معايا شاب جارى و رد عليهم و قالهم مش هتمشى دى صاحبة حق ياللى أسمكوا رجاله و أنا معاها و لو هيرضيها أنه يموت هموتهولها النهارده و راح جاب حديده و فضل واقف معايا .

بس أنا خدت حقى , و أهلى جابولى حقى , اللى أنا كنت متأكده انى لو روحت القسم حقى ده مكنش هيجيلى ..
الموضوع كان حساس شويه لأننا جيران , 
و برغم كده أنا مسكتش و جبت حقى أنه بان كداب و حيوان و هيمشى دماغه فى الأرض من كدبه و أعماله 

أنا أتعرضت للتحرش و مسكتش و مش هسكت .
مش هيجيب حق البنات غير البنات .
أرجوكِ متسكتيش عن حقك .

أنا زعلانه ...
....................

من شوية الرسالة دى اتبعتلى من استاذ ليا واخ 

حد ساعدنى كتيير جدا في قضيتي ووقف جنبي..

الرسالة دى استيت من بنت مش عندي في 

الفريندس ولا حتى اعرفها...البنت دى ناشرة الكلام 

دة على صفحتها...بعتلها واستأذنتها في نشر 

القصة على المدونة.. ماعترضتش بالعكس قبلت 

وبشدة بس كان عندها شرط واحد "ان الرسالة دى

تأثر في كل بنت وتخليها متسكتش تانى"...

متسكتيش دة حقك..متسبيش حقك..

تحية والف تحية للبنت اللى بألف بنت ........صاحبة

الرسالة :)

هاتى بوسة يابت..

بت هاتى بوسة يابت بت هاتى حتة يابت.....دى مش جملة تحرش مع انها بتستخدم كتير في التحرش..دى اغنية تسمي مهرجان..
انا لما قلت لناس كتير انى هتكلم في الموضوع دة ..قالولى بلاش لان الاقبال الشعبي على  الاغانى دى كتير وهيكرهونى ويكرهو مدونتى ومش هيتابعونى ..!! حقيقي ؟..! :(
بس مش دة المهم ..المهم انى هتكلم وخلاص..من واقع بشوفه..
انا مش عارفة من انهى تراث غنائي جات لنا الاغانى دي..بس مش مهم ان اى كلام فاضي يتقال مع موسيقي مزعجة يطلع نوع جديد اسمه مهرجان ..مش دة المهم..
المهم ازاى بتتوظف المهرجانات دى في الشارع...
ابسط مثال على التوظيف الفعلى ..هى اغنية الوسادة الخالية..الاغنية دى اتوظفت صح في التحرش بالبنات..يعنى البنت تركب تاكسي ..يبقي مشغلها السواق وشغال يغنى ويبص للبنت في المراية "بت هاتى بوسة يابت ..بت هاتى حتة يابت"..وبرضو لما تعدى من قدام محل مشغلها لازم يمشي وراها ويغنى الاغنية...!!
دة غير ان في اغانى قمة في السفهه والانحطاط الاخلاقي ..وفيها شوية احاءات وكلمات ..متتقالش حتى في سوق بلدي..دة ثراثنا الغنائي في الافراح واغانى الحنن موصلش لقمة "البجاحة" دى...
انا مش هقولكم متسمعوش لان دة في االاخر ازواق وانا مقدرش اتحكم في ازواق البشر ..اللى بيتحكم في كدا هى ثقافة المجتمع عمتا...
بس يريت لما يألفو الاغانى ..ميألفوهاش عشان يتحرش بينا في الاغنية وبعد كدا واحد يتحرش بينا من خلالها في الشارع ..
#ارحمونااااا ..

هوووووو دة...!

ازيكم عاملين اية..يارب تكونو كدا بخير...وخصوصا بنات مصر..لان بنات مصر مش دايما بخير...!
انهاردة انا هتكلم عن مصطلحات تحرش....زي "يامانجة.."قديمة اوى بس مستمرة..الشباب المصري بيحافظ على تراثة..
وماتيجي نيجي ونجيب مليجي..ودى احدث التعليقات في السوق..
نيجي بقا لتعليق وسطي ..كلنا شاركنا في وجودة.."هووووو دة"...بتاع لامؤاخذة نجم الجيل..تامر حسني....
طبعا تامر بيه حسنى..اول متحرش تحرش على شاشة عرض كبييرة وكلنا ضحكنا وسقفنا...الحقيقة الفنان تامر...بيبقي مصمم في كل افلامه انه يطلعلنا تقليعه جديدة للتحرش..
تبقي ماشية البنت في امان الله تلاقي الشاب جاى ويقولها "هووووو دة"...او "اكتر حاجة بحبها فيكي".....الكلمة دى خدت وقت مع الشباب واتعذبت بنات بسببها...كتيييييير..
انا نفسي وانا ماشية في الشارع اتقالى ياما "ط...يبة قلبك"...
اخص انا مش متخيلة ازاى شاب متحرش وبيألش كمان....
طب والحل..
اانا شخصيا مع احدث تعليقات تامر للتحرش ..مبقتش لاقية حل..وخصوصا ان في كارثة اكتر من كدا..
العيال الصغيرة.......! في الشوارع بيتحرشو بتعليقات تامر اكتر من اى حاجة تانية..الطفل الصغير كمان تلوث من حركة من حركاته....وهنتكلم عن الاطفال في نوت لوحدها بعدين...
خلينا الاول في تامر .....انا هواجهله رسالة..
يا تامر بية حسني ..احنا كلنا مقدرين ان دمك اهــ..ولا بلاش اهله ملهمش ذنب...
ان دم حضرتك خفيف...بس يريت تخف دمك بشكل تانى...ومطلعلناش كله مرة تعليقة جديدة للتحرش تتعذب بيها البنات سنين....!او اقولك متخفش دمك خالص..وطبعا مقدرش مواجههش "الشكر"..لشباب مصر الجميل..اللى بيقلد كل حاجة....!!
انا خلصت.....!
مع عدم الاعتزار لتامر لامؤاخذه حسني...!

رسالة من بنت

انا هنقلكم الرسالة زى ما جتلى على الان بوكس بالظبط..وزى ما قلت ان المدونة هتعرض كل رسالة من بنت هتجيلي عن التحرش..
..................................................

أسوء شئ ممكن تتعرضله اي انثي هو التحرش بكل انواعه

انا بنت زي اي بنت اتعرضت لتحرش بأكتر من طريقة

طبعا اسوأ شئ واسوأ احساس ممكن تحسه اي بنت بعد التحرش ده رغم ان ملهاش ذنب

موقف من المواقف اللي اتعرضت ليها مش من يوم ولا من شهر دي من سنين

كنت بسافر كليتي عادي مع زمايلي وكنا متعودين نركب قطر معين عشان نقدر نركب فيه وخصوصا ان السفر بدري بيكون صعب في المواصلات لأن اغلب الطلبة بيسافروا في الوقت ده

استنيت انا وزمايلي القطار مجاش في ميعاده فكنا مضطرين اننا نركب اللي بعده اللي مبيبقاش فيه مكان انك تقف حتى مش تقعد

المهم اضطرينا وركبنا وكنا بنتحشر طبعا ركاب قطارين بيركبوا في قطار واحد (القطار اللي ركبناه ده بيسافر بين المراكز للأسف غير آدمي من جوه هو يشبه قطار أبو قير الموجود في اسكندرية  لكن كان بيسافر بين ايتاي البارود واسكندرية ) المهم ركبنا طبعا في ناس مننا واقفة على رجل واحدة القطار اتحرك مشينا طبعا الناس متلزقة في بعض متعرفش تتحرك من مكانك طبعا في وسط الزحمة انا واصحابي تهنا من بعض كل واحدة على ما عرفت تدخل في مكان ووقفت فيه فكل واحدة في حته مش جنب بعض نقدر نتسند على بعض

جه واحد طويل عريض شنبه في وشه مغطي نص وشه بس للأسف دا (اقل من اني اقول عليه راجل بعد اللي عمله) جه ووقف طبعا انا مجيش نص طوله وقف شوية شوية بيمد ايده ابتدى يمد جسمه ويحك نفسه فيا عليت صوتي عليه وقولتله انت انسان مش محترم فطبعا اللي في القطر بس في ايه ابعدي انتي عنه والبنات اللي ميعرفونيش ابتدوا يشدوني وخلوني قعدت على رجل واحدة طبعا الموقف استفذني جدا انتوا بتشدوني وتقعدوني طيب غلطوه قولوله اي حاجة عاقبوه لا انا اللي غلطانه انا اللي مجيش نص طوله ولا نص سنه حتى يقولولي كده  طيب ماهو كل يوم بيركب القطار وممكن يعمل كده مع كل واحدة يشوفها

طبعا موقف مقزز واليوم ده كان عندي امتحان مش عارفة اوصف احساسي كان ازاي

شعور مقزز جدا ومقرف جدا...
..............................................
تعليقي :..
انا حاسة بيكي وحاسة باللى انتى حسيتي بيه...وحاسة كمان اد اية انتى أتالمتى ان مجاش حقك لما لمسك جسمك..احيكي على انك بعتيلي شكرا وشكرا لكل بنت ..بتحاول تواجهه المجتمع ب"مرضه"...